අපි හැමෝම කැමතියිනෙ හැමදාම අපේ තරුණ පෙනුම ඒ විදිහටම පවත්වාගෙන යන්න. නමුත් අපේ වයස, අපේ පුරුදු, අපි ගන්නා ආහාරවල ගුණාත්මකභාවයන් මත මේ දේවල් වෙනස් වෙන්න පුලුවන්. වයසට යන විටදී සම රැළි වැටීම ස්වභාවිකයි. නමුත් තරුණ වයසෙදීම සම රැලි වැටේ නම් එය ඔබේ පෙනුමට කරන බලපෑම සුළුපටු එකක් නෙමෙයි.

ඒ සඳහා සම හොඳින් මසාජ් කිරීම තුලින් යහපත් ප්‍රතිඵල ලබා ගන්න පුලුවන්. මෙහිදී ක්‍රමානුකූලව කාලයක් එක දිගට මසාජ් කිරීම තුලින් සම රැලි වැටීමේ තත්වයන් මග හරවා ගන්න ඔබට පුලුවන්. 

පළමුව මුහුණ හොදින් සෝදා ඔබ එදිනෙදා භාවිතයට ගන්නා තෙල් වර්ගයක් හෝ ක්‍රීම් වර්ගයක් ආලේප කරන්න.

1. මැද ඇඟිලි සහ දබර ඇඟිලි වලින්  කම්මුල් දෙපස සම උඩු අතට මසාජ් කරන්න.

2. දබර ඇඟිලි දෙක නිකටේ හරි මැද තබා දෙපසට මසාජ් කරන්න.

3. නාසය කෙළවර සිට උඩු අතට දබර ඇඟිලි වලින් මසාජ් කරන්න.

4. ඇස් වසාගෙන ඇහිබැම යට දබර ඇගිලි මඟින් සියුම්ව පිරිමදින්න. ඇහේ යටි කොටස මහපට ඇඟිල්ලෙන් මසාජ් කරන්න.

5. දබර ඇඟිලි වලින් නළල දෙපැත්තට පිරිමදින්න.නිකටේ යටි කොටස් උඩු අතට මසාජ් කරන්න.

ස්ත්‍රී පුරුෂ භේදයකින් තොරව හැදෙන කුරුලෑ කියන්නේ ස්වභාවික දෙයක් මිසක් රෝගී තත්වයක්නම් නොවෙයි. හැබැයි ඉතින් මේ පුංචි බිබිල හිතට නම් සෑහෙන්නම වදයක්.

කුරුලෑ හැදෙන්න ප්‍රධාන වශයෙන්ම බලපාන හේතු විදිහට, ස්නේහස්‍රාවී ග්‍රන්ථවල ක්‍රියාකාරීත්වය නිසා සම මතු පිටට පැමිණෙන ස්නේහස්‍රාවී ද්‍රවය සමේ ඇතිවන ඝනකම් හේතුවෙන් සම මතුපිටට පැමිණීමට නොහැකිව අවහිර වීම තුළින් හා හෝමෝන වල ක්‍රියාකාරීත්වය දක්වන්න පුලුවන්. ඒ වගේම අපේ නොසැළකිලිමත් ක්‍රියාවන් නිසාද කුරුලෑ ඇතිවෙනවා. ප්‍රමිතියෙන් තොර ආලේපන වර්ග භාවිතය, තෙල් ආහාර අධිකව ගැනීම, ක්ෂණික ආහාර වර්ග ගැනීම, අධික ලෙස චොකලට් කෑම, නින්ද අඩුවීම, හිතුමතේ ඖෂධ වර්ග ගැනීම,  සිරුර උෂ්ණාධික වීම වගේම මානසික ආතතියත් මේ සදහා බලපානවා.

කුරුලෑ වර්ග කිහිපයක්ම ඇති අතර කළු හෝ සුදු හිස සහිත බිබිලි මේ අතරින් බහුලව දකින්න පුලුවන්. 

මුණේ බිබිලක් තියෙන එක හිතට වදයක් කියන එක අමුතුවෙන් කියන්න ඕනේ නෑනේ. කුරුලෑවක් දැක්කාම ඒ දැක්කවෙලේ ඉදන් අපි කරන්නේ බිබිල අල්ලන එකයි නැත්නම් ඒක කඩලා අයින් කරන්න හිතන එකයිනෙ. හැබයි මේ පුරුද්ද නම් එච්චර හොද පුරුද්දක් නෙමෙයි. 

කුරුලෑ ඇල්ලීමෙන් එහි ඇති පටක වලට හානි වී පසුව කැළල් බවට පත් වෙන්න පුලුවන්. මේ නිසා කුරුලෑ ඇල්ලීම, කැඩීම හෝ නියපොතු වලින් මිරිකීම සිදු නොකළ යුතුයි.

ඉතින් මේ පුංචි බිබිලකට අපේ මූණ කැත කරන්න නොදී ගෙදරදීම පහසුවෙන් කරන්න පුලුවන් දේවල් ටිකක් කරලා මේ වදෙන් ගැලවෙමු.

මේ සදහා,

• කොහොඹ දලු, අමු කහ, සුදු හදුන් තැම්බු ජලයෙන් මුහුණට වාෂ්ප අල්ලන්න.

මෙමගින් සමේ රෝම කූප විවර වී එහි තැන්පත් වී ඇති අපද්‍රව්‍ය ඉවත් වේවී. ඉන් පසුව පිපිඤ්ඤා යුෂ මුහුණේ ආලේප කරගන්න මුහුණ පිරිසිදු කරන්න.

• ලෙමන් යුෂ ස්වල්පයකින් පුළුන් කැබැල්ලක් පොගවා මුහුණේ ආලේප කර ටික වේලාවකින් ඇල් වතුරින් හෝදන්න.

• කුරුලෑ ඇති තැන්වල මී පැණි ආලේප කර ටික වේලාවකින් හෝදන්න.

• කෝමාරිකා මුහුණේ ගා රැයක් තිබෙන්නට හැර ඇල් වතුරින් හෝදා ඉවත් කරන්න.

• තෙල් සහිත හා මස් මාංස ආහාර වර්ග ගැනීම සීමා කරන්න.

• නිතර පිරිසිදු ජලය බොන්න.

• විටමින් E සහ C අඩංගු එළවළු පලතුරු වැඩි වශයෙන් ආහාරයට එක් කරගන්න

​​​​​​​

• රුධිරය පිරිසිදු කරන නෙල්ලි, රසකිද, ඉරමුසු, බෙලි මල් වැනි පාන වර්ග නිතර බොන්න.

අපේ කලින් පොස්ට් එකෙන් ඔයාලා ඇස් වටේ කළු වීමට හේතු දැනගත්තනේ, ඉතින් අපි දැන් ඒ තත්වය වළක්වාගන්න පුළුවන් ක්‍රම කිහිපයක් ගැන දැනුවත්වෙමු. 

අයිස් කැට වලින් ඇස් වටා සම්බාහනය කිරීමෙන් ඇස් වටා රුධිර සංසරණය ක්‍රමවත් කරගන්න පුළුවන් වගේම ඒ මඟින් ඇස් වටා අදුරු වීමත් වළක්වාගන්න පුළුවන්. 

• එළකිරි,
• පිපිඤඤා යුෂ,
• සමන් පිච්ච මල් වතුර,
• කෝමාරිකා ජෙල්,
• ඇපල් යුෂ,
• මිදි යුෂ  

ශීතකරණයේ තබා අයිස් කැට සාදා පිරිසිදු රෙදි කැබැල්ලකට දමා ඇස් වටා සම්බාහනය කරන්න. 
 

• තේ බෑග් දෙකක් ගෙන වතුර ටිකක් දමා ශීතකරණයේ ටික වේලාවක් තබන්න. ඊට පස්සේ ඇස් මත තබා විනාඩි 15කින් අයින් කරන්න. 
   
• පිපිඤඤා පෙති 2 ක් හරි අල පෙති 2ක්  හරි ඇස් මත තබා විනාඩි 15කින් අයින් කරන්න.
   
• අර්තාපල් යුෂ පුළුන් කැබලි 2ක පොඟවා ඇස් යට තබා විනාඩි 10 කින් අයින් කරන්න. 
   
• නැවුම් එළකිරි ගෙන ඇස් වටා සියුම්ව සම්බාහනය කරන්න. 
                                             
• බිත්තර සුදු මදයකට ලෙමන් බිංදු කිහිපයක් දමා පුළුන් කැබලි 2 ක පොගවා ඇස් යට තබා විනාඩි 10 කින් අයින් කර අයිස් වතුරින් සෝදන්න.  

ඔබේ ඇස් වටා අධික ලෙස අදුරු පැහැ වෙලා නම් වෛද්‍ය ප්‍රතිකාර සඳහා යොමුවීම තමා වඩා වැදගත් වන්නේ.
 

එහෙම නැතුව සාමානය තත්ත්වයක් නම් ඔබට තියන්නේ ගෙදරදීම පහසුවෙන් හදාගන්න පුළුවන් මේ ක්‍රම අනුගමනය කරලා ඇස් වටා අදුරු පැහැය නැතිකරගන්න ඔබට පුලුවන්.